గురితప్పిన గన్‌

గురితప్పిన గన్‌
– కరువుపై మాటల యుద్ధమే
– నీళ్లు లేక నిష్ఫలం
– ఎండిపోయిన 80 శాతం వేరుశనగ పైరు
– ఉన్న పైరూ దిగుబడి ప్రశ్నార్థకమే!
– ఎండిన పైరు పీకడానికీ రైతుకు డబ్బు ‘కరువు’
రెయిన్‌గన్‌ గురి తప్పింది! ఆలస్యంగా ప్రారంభించడంతో అట్టహాసపు ప్రచారమే మిగిలింది. ఊడ దిగని పైరును గన్‌లతో తడిపినా ఉపయోగం లేకుండా పోయింది. ప్రస్తుతం ఎండిపోయిన పైరును పీకించడానికి కూడా రైతుల చేతిలో డబ్బు లేకుండా పోయింది. పైరూ పొగొట్టుకొని, పీకించేందుకు డబ్బూ చేతిలో లేకా వేరుశనగ రైతులు నానా అవస్థలు పడుతున్నారు. ఒక్క అనంతపురం జిల్లాలోనే 13.50 లక్షల ఎకరాల్లో వేెరుశనగ ఎండిపోయింది. కళ్లముందే పంట ఎండిపోతుంటే ఏమీ చేయలేని నిస్సహాయులుగానే రైతన్నలు మిగిలారు. వాస్తవం ఇలా ఉంటే, తెలుగుదేశం పార్టీ ‘కరువుపై గన్‌’ శీర్షికతో క్షేత్రస్థాయి నివేదిక పేరిట ముఖ్యమంత్రి చంద్రబాబునాయుడి నిలువెత్తు చిత్రంతో ఒక పుస్తకాన్ని ప్రచురించింది. రాయలసీమలో కరువుపై యుద్ధం ప్రారంభమైందని, ఎండిపోతున్న పంటకు జీవమొచ్చిందని, నీళ్లు నిండిన రైతు కళ్లలో ఆనందం కనిపిస్తోందంటూ రాష్ట్ర వ్యాప్తంగా ప్రచారం ప్రారంభించింది. ఈ అంశాలను ప్రజాశక్తి పరిశీలించింది. పుస్తకంలో పేర్కొన్న కొందరు రైతులతో మాట్లాడింది. రాయల సీమలో మాటలకే పరిమితమైన ‘కరువుపై యుద్ధం’లోని క్షేత్రస్థాయి వాస్తవాలను సేకరించింది.

ప్రజాశక్తి – రాయలసీమ యంత్రాంగం
రాయలసీమలోని అనంతపురం, కర్నూలు, చిత్తూరు, కడప జిల్లాల్లో వేరుశనగ సాధారణ సాగు విస్తీర్ణం 28 లక్షల ఎకరాలు. అయితే 22.13 లక్షల ఎకరాల్లోనే సాగు చేశారు. అనంతపురం జిల్లాలో 15 లక్షలు, కర్నూలు జిల్లాలో 2.93 లక్షలు, చిత్తూరు జిల్లాలో 3.20 లక్షలు, కడప జిల్లాలో లక్ష ఎకరాల్లో సాగయింది

వాస్తవం ఇలా…
నాకున్న ఆరు ఎకరాల పొలంలో వేరుశనగ పంట సాగు చేశాను. రెయిన్‌ గన్లు మాకు ఇవ్వలేదు. సకాలంలో రెయిన్‌గన్లు అందించి ఉంటే పంటను కాపాడుకునే వాళ్లం. అర్హులైన వారికి రెయిన్‌గన్లు ఇవ్వలేదు. పంట ఎండిపోతోంది. కనీసం పంటపెట్టుబడులు కాదుకదా పశుగ్రాసం కూడా దక్కని పరిస్థితి నెలకొంది.
– భూమన్న గారి నారాయణ

టిడిపి పుస్తకంలో ఇలా …!
ఇట్లా పంటలు కాపాడుకోవచ్చని తెలిస్తే ఆ పని చేసుకునే వాళ్లం. జీవితకాలం వేరే పార్టీకి పనిచేసినా పట్టించుకోకుండా సర్పంచ్‌ రెయిన్‌గన్లు పెట్టించారు. సిఎం సారు చెప్పినాడు కానీ మేము పంటకుంటలు పెట్టించలా. పెట్టుంటే బాగుండేది. వచ్చే సంవత్సరం మరిన్ని గన్లు పెడితే బాగుంటుంది.

ముఖ్యమంత్రి వెళ్లగానే తీసేశారు..
గంగరత్నమ్మ, మహిళా రైతు. ఉప్పునేసినపల్లి, ధర్మవరం మండలం, అనంతపురం జిల్లా
ప్రశ్న : మీకు ఎన్నెకరాల పొలముంది?
గంగరత్నమ్మ : నాలుగెకరాలు
ప్రశ్న : రెయిన్‌గన్‌లు ఎన్నెకరాలకు వాడారు?
గంగరత్నమ్మ : నాలుగెకరాలకు వాడాము.
ప్రశ్న : ఎంత తడిసింది?
గంగరత్నమ్మ : కేవలం రెండు ఎకరాలకు అరకొరగాతడిసింది.
ప్రశ్న : కారణమేంటి ?
గంగరత్నమ్మ : ముఖ్యమంత్రి చంద్రబాబు పర్యటన సందర్భంగా అధికారులు ఆర్భాటంగా మూడు రెయిన్‌గన్‌లు, 10 స్ప్రింక్లర్లు ఏర్పాటు చేశారు. అయితే సిఎం వెళ్లిపోగానే అవి తీసుకెళ్లిపోయారు. దీంతో రెండుఎకరాల్లో మాత్రమే కొద్దిగా తడి అందింది.
ప్రశ్న : రెయిన్‌గన్‌లు మీకేమైనాఉపయోగపడ్డాయా ?
గంగరత్నమ్మ : రెయిన్‌గన్‌ల వల్ల తమ పంటకు ఎటువంటి ఉపయోగం కలగలేదు. అప్పటికే పంట ఎండిపోయిందని అయితే అధికారులు ముఖ్యమంత్రి పర్యటన ఉండడంతో ఆర్భాటంగా రెయిన్‌గన్‌లు, స్ప్రింకర్లు ఏర్పాటు చేసి రెండు రోజులు మాత్రమే రక్షక తడులు అందించారు. ముఖ్యమంత్రి వెళ్లిపోగానే అవి తీసుకెళ్లిపోయారు. రెండు రోజులు తడి ఇస్తేనే పంటకు ఏమి లాభం చేకూరుతుంది. అప్ప టికే పంటఎండిపోవడంతో వాటి వల్ల ఎటువంటి ప్రయోజనం చేకూరలేదు. మిగిలిన రైతుల పంట పొలాల మాదిరేతమపంట కూడా దిగుబడి లేదు. మమ్మల్ని ప్రభుత్వమే ఆదుకోవాలి

పుస్తకంలో ఇలా
రెయిన్‌గన్ల వాడకంతో పూర్తిపంటను చూస్తామన్న నమ్మకం కలిగినట్టు టిడిపి ప్రచురించిన పుస్తకంలో పేర్కొన్నారు. ‘సిఎంగారు రెయిన్‌ గన్లు పెట్టుమన్నారు. క్వారీ గుంతలో నీళ్లనా ఆలోచన రాలా.. ఇప్పుడు ఆ నీళ్లు పెట్టుకుంటున్నాము. మా పంట బతికింది’ అని గంగరత్నమ్మ చెప్పినట్లు ప్రచురించారు.

పంటంతా నష్టపోయా. ఆదుకోవాలి!
బోయ బుడిగే మారెక్క, మల్లాపురం, రాయదుర్గం మండలం, అనంతపురం జిల్లా
ఈ ఏడాది అదునులో వర్షం కురవక పోవడంతో మరోసారి పెట్టిన పెట్టుబడులు రాక పోగా అప్పుల్లో కూరుకు పోయాం. నాకున్న మూడెకరాల సొంత పొలంతోపాటు మరో ఎనిమిది ఎకరాలు కౌలుకు తీసుకున్నాను. మొత్తంగా రూ.లక్షన్నర పెట్టుబడి పెట్టాను. ఆరంభంలో వర్షాలు ఆశాజనకంగా కురవడంతో సంతోషపడ్డాను. మడకలు తోలడం, ఎరువులు, కూలీల ఖర్చులకు భారీగా వ్యయం పెరిగింది. రెయిన్‌గన్లతో పంటను కాపాడుకోవాలనే విషయం మాకు ఏ అధికారీ చెప్పలేదు. ఈ ఏడాది పెట్టిన పంట పెట్టుబడులు కూడా రావు. పంట మొత్తం నష్టపోయాను. ప్రభుత్వమే మమ్మల్ని ఆదుకోవాలి.
పుస్తకంలో ఇలా …!
తెలుగుదేశం పార్టీ శ్రేణులు ప్రచారం చేస్తున్న పుస్తకంలో రెయిన్‌గన్‌లు భరోసా ఇచ్చాయని, రక్షక్షతడితో ఉపయోగం ఉందని, ఆ మేరకు తనకు అర్ధమైనట్టు చెప్పారని పేర్కొన్నారు.

ట్యాంకర్లతో నీరు తెచ్చుకోమన్నారు
మాకున్న రెండెకరాలకుతోడు మరో మూడు ఎకరాలను కౌలుకు తీసుకున్నాం. ఎకరానికి పది వేలు కౌలు, మరో పదివేలు ఖర్చు చేసి వేరుశనగ సాగు చేశాం. వర్షం లేక పైరు ఎండిపోయింది. పెట్టుబడి కూడా వస్తుందో రాదో?. సిఎం మా పొలంలోనే రెయిన్‌గన్‌ను ప్రారంభించారు. సిఎం వెళ్లిన వెంటనే ట్యాంకర్లు లేక రెయిన్‌గన్‌లు వృథాగా ఉన్నాయి. అధికారులను అడిగితే ట్యాంకర్లతో నీరు తెచ్చుకోండన్నారు.
గీత(కౌలురైతు), అరికెర, ఆలూరు మండలం, కర్నూలు జిల్లా

తాగడానికే నీరులేదు.. పొలానికి ఎక్కణ్నుంచి తెచ్చేది?
తాగడానికే నీరులేదు. అధికారులేమో ట్యాంకర్ల ద్వారా నీరు తెచ్చుకోండి ఆయిల్‌ ఇంజన్లు, రెయిన్‌గన్లు ఇస్తాము అనిజెప్పారు. నీరు ఎక్కడి నుంచో తెచ్చుకోలేక చేను ఎండిపాయే. 936 అడుగుల లోతు బోరు వేసినా చుక్క నీరు పడలేదు. దరిదాపుల్లో నీటి కుంటలు, చెరువులు లేవు. పొలాలు తడిపేందుకు ఎలా తెచ్చుకోవాలి. నాకున్న సాగు చేసిన వేరుశనగ, ఉల్లి పంటలు పూర్తిగా ఎండిపోయాయి. గ్రాసం కూడా చేతికిరాలేదు. పంట ఏడుదశలో నీరు పెట్టినా పంట చేతికిరాదని తెలిశాక వదిలేశాం.
మల్లయ్య, అరికెర, ఆలూరు మండలం, కర్నూలు జిల్లా

http://www.prajasakti.com/Article/AndhraPradesh/1851804