లారీని నడిపిందెవరు?

లారీని నడిపిందెవరు? ప్రజాశక్తి
– క్లీనరా, మాఫియా మనిషా ?
– అంతుచిక్కని ప్రమాద కారణాలు
– నిన్న ఇసుక మాఫియా లేదన్న లోకేశ్‌
– నేడు టిడిపి ఇసుక మాఫియా నేతల్ని బహష్కరించిన చంద్రబాబు
ప్రజాశక్తి – అమరావతి బ్యూరో-తిరుపతి సిటీ ప్రతినిధి
ఏర్పేడు ఘటనపై అనేక అనుమానాలు వ్యక్తమవుతున్నాయి. అనుకోకుండా జరిగిన ప్రమాదమా ? మాఫియా చేయించిందా ? దీని వెనుక ఎవరున్నారనే అంశంపై ఇప్పటికీ స్పష్టత రాలేదు. మరోవైపు రాష్ట్రంలో ఇసుక మాఫియా లేదని రాష్ట్ర మంత్రి నారా లోకేశ్‌ మునగలపాలెంలో శనివారం బాధితుల్ని పరామర్శించిన సందర్భంగా ప్రకటించారు. టిడిపికి చెందిన ఇసుకమాఫియాతో సంబంధాలున్నాయని వచ్చిన అధికారిక నివేదిక ఆధారంగా చిరంజీవులునాయుడు, ధనుంజయ నాయుడును పార్టీ నుండి బహిష్కరిస్తున్నట్లు పార్టీ జాతీయ అధ్యక్షులు చంద్రబాబు ఆదివారం ప్రకటించారు. దీంతో లోకేశ్‌ కూడా మాఫియా విషయంలో ప్రజల్ని తప్పుదోవ పట్టించారనే అనుమానాలు బలపడుతున్నాయి.

24 గంటలు గడవకముందే టిడిపిలో రెండు విరుద్ధ వ్యాఖ్యలు చోటుచేసుకోవడంతో ఏర్పేడు ఘటనపై అనుమానాలు మరింత బలపడుతున్నాయి. సహజంగా చంద్రబాబు ఏ సంఘటనలోనూ ఇంత తొందరగా చర్యలు తీసుకోలేదు. పైగా పార్టీ నుండి బహిష్కరించనూలేదు. ఏర్పేడు ఘటనపై ఇంటిలిజెన్స్‌ ఇచ్చిన నివేదికలో ఇసుక మాఫియా వెనుక టిడిపి నేతలుండడం, వారిద్దరూ గ్రామంలో ప్రజల్ని బెదిరించడం, మరునాడు ప్రమాదం జరగడం ఒకదానికొకటి అనుబంధంగా ఉండటంతో పాటు సంఘటన కూడా పలు అనుమానాలకు తావిస్తోంది.

దీనిపై స్పష్టమైన ఆధారాలుండడంతోనే పార్టీకి నష్టం వాటిల్లకుండా వుండేందుకు చంద్రబాబు చర్యలు తీసుకున్నట్లు సమాచారం. ప్రమాదం జరిగిన వెంటనే వాస్తవాల్ని కప్పిపుచ్చేందుకు లోకేశ్‌ ప్రయత్నించినా చంద్రబాబు నిర్ణయంతో అది కాస్తా బట్టబయలయ్యింది. సంఘటన జరిగిన తీరుపై పలు అనుమానాలు వ్యక్తమవుతున్నాయి.

ఆదివారం ప్రతిపక్షనేత జగన్‌ పర్యటించిన సమయంలో మునగలపాలెం ప్రజల్లో ఎక్కువమంది అధికారపార్టీ నేతలే ఈ ప్రమాదం చేయించారని ఆవేదన వెలిబుచ్చారు.

డ్రైవర్‌కు పూటుగా మందు తాగించి ఇసుక మాఫియాకు చెందిన వ్యక్తులే లారీని నడిపి ప్రమాదం చేసి ఉంటారనే అనుమానాలూ వ్యక్తమవుతున్నాయి. ఏదేమైనప్పటికీ 17 మంది మృత్యువాత పడ్డారు. రెండురోజులుగా పోలీసులు జరుపుతున్న విచారణలో అనేక విషయాలు వెలుగులోకొచ్చినట్లు తెలిసింది.

అదుపులోకి తీసుకున్న సమయంలో డ్రైవర్‌ శరీరంలో 250 శాతం ఆల్కహాల్‌ ఉందని రవాణాశాఖ అధికారుల పరీక్షలో తేలింది. దీన్ని అక్కడే రవాణా అధికారులు ధృవీకరించారు. అంతస్థితిలో ఆల్కహాల్‌ ఉంటే మనిషి పూర్తిగా విచక్షణ కోల్పోతాడు. కనీసం నిలబడలేని స్థితిలో ఉంటాడు. పరిసరాలను పూర్తిగా మార్చిపోతాడు. అదే స్థితిలో లారీని 60 కిలోమీటర్లు నడుపుకొచ్చినట్లు చెప్తున్నారు. అది సాధ్యం కాదని ఫోరెన్సిక్‌ రంగ నిపుణులు, పలువురు పోలీసు ఉన్నతాధికారులూ చెప్తున్నారు. ఎంత మద్యం సేవించే వ్యక్తికైనా శరీరంలో ఆల్కహాల్‌ 160 శాతం ఉంటే దాదాపు స్పర్శను కోల్పోతారు. అటువంటిది 250 శాతం ఉంటే మనిషి స్టీరింగ్‌ను ఎలా పట్టుకుంటాడని ప్రశ్నిస్తున్నారు

ప్రమాదంలో మృతిచెందివారు, బాధితులూ ఇసుక మాఫియాపై ఆరునెలలుగా పోరాడుతున్నారు. పలువురు నాయకులు అంతకుముందురోజు మునగలపాలెం వెళ్లి బెదిరింపులకు దిగారు. అయినా పోలీసులు మాత్రం ప్రమాదం జరిగిన వెంటనే తడుముకోకుండా డ్రైవర్‌ మద్యం తాగాడాని, అతని శరీరంలో 250 శాతానికిపైగా ఆల్కహాల్‌ ఉందని ప్రకటించేశారు. విచారించి ఏం జరిగిందో తెలుసుకోకుండానే నేరుగా మద్యం తాగడం వల్ల ప్రమాదం జరిగిందని మీడియా ముందు ప్రకటించారు. దీనిపై పలువురు అనుమానాలు వ్యక్తం చేసిన తరువాత వేర్వేరు కోణాల్లో విచారణ మొదలుపెట్టారు.