Category Archives: Uncategorized

బాబు సీనియారిటి దేనికి పనికొచ్చింది ?

40 ఇయర్స్ ఇండస్ట్రీ బాబు సీనియారిటి దేనికి పనికొచ్చింది ?
ఏపీ ముఖ్యమంత్రి చంద్రబాబునాయుడు తనపై విమర్శలకు తానే అవకాశం కల్పిస్తున్నరా?. అంటే అవుననే అంటున్నాయి పార్టీ వర్గాలు.
దేశంలో అందరి కంటే తానే సీనియర్ అని..తనను మించిన సీనియర్ ఎవరూలేరని చంద్రబాబు ప్రగాఢ విశ్వాసం. మరి అంత సీనియర్ అయితే ఎలా ఉండాలి. ఏపీని ఎలా పరుగులు పెట్టించాలి. కానీ చేస్తున్నది ఏమిటి?

తన సీనియారిటీని రాష్ట్రాభివృద్ధి కోసం కాకుండా…స్కీమ్ స్కీమ్ లోనూ స్కాం చేసి..వందల కోట్ల రూపాయలు ఎలా దోచుకోవాలన్నదానికే ఉపయోగిస్తున్నట్లు కన్పిస్తోందని అధికార వర్గాలు పేర్కొంటున్నాయి.

ఆయన సీనియారిటీ ఎలా ఫెయిలయిందో ఓ సారి చూడండి.

1.టీడీపీ ఎన్డీయే నుంచి బయటకు రావటానికి ఏడాది ముందు నుంచే ప్రధాని మోడీ చంద్రబాబుకు కనీసం అపాయింట్ మెంట్ ఇవ్వలేదు. ఏమి జరుగుతుందో అప్పుడు ఆయనకు తెలియదా?. ఆ మాత్రం స్మెల్ చేయలేకపోయారా?.

2.ప్రత్యేక ప్యాకేజీ ప్రకటించినప్పుడే అందులో విభజన చట్టంలో ఉన్నవే తప్ప..కొత్తగా ఏమీలేవని అందరూ గగ్గోలు పెట్టారు. ఎంతో సీనియర్ అయిన..ప్రభుత్వ వ్యవస్థ చేతిలో ఉన్న చంద్రబాబు ఎందుకు ప్యాకేజీలో ఏమీలేవని ఎందుకు అంచనాకు రాలేకపోయారు?. చట్టబద్దత అంటూ హడావుడి చేసి చివరకు వెనక్కితగ్గారు?

3.అంత సీనియర్ చంద్రబాబుకు ప్రత్యేక హోదాతో ఏమి వస్తాయో తెలియదా?. ఎవరైనా నన్ను ఎడ్యుకేట్ చేయండి. హోదా సాధించిన రాష్ట్రాలు ఏమి సాధించాయి అని అసెంబ్లీ సాక్షిగా ఎలా అనగలిగారు. ఇప్పుడు అదే హోదా వెంట ఎందుకు పరుగులు పెడుతున్నారు? ఎవరూ ఎడ్యుకేట్ చేయకుండానే ఎలా ఎడ్యుకేట్ అయ్యారో?.

4.పాలనలో ఎంతో అనుభవం ఉన్న చంద్రబాబు రాజధాని అమరావతి డిజైన్లకు మూడేళ్ళ సమయం తీసుకుంటారా?. ఇది వ్యూహాత్మక ఎత్తగడ కాక ఇంకా ఏమైనా ఉందా?. అందుబాటులో ఉన్న టెక్నాలజీతో అద్భుతాలు సృష్టించే ఈ కాలంలో డిజైన్లకు మూడేళ్ళ కాలం తీసుకోవటంలో చంద్రబాబు సీనియారిటీ తేలిపోయిందా?

5.నాలుగేళ్లు సఖ్యతతో ఉండి సాధిస్తానని…తనను నమ్మాలని ఏపీ ప్రజలను కోరిన చంద్రబాబు…ఇప్పుడు పోరాటం తప్ప..మరో మార్గం లేదని చెప్పటం వెనక మతలబు ఏమిటి?. మోడీ మట్టి..నీళ్ళు ఇచ్చినప్పుడే చంద్రబాబు లాంటి సీనియర్ కు అసలు విషయం అర్థం కాలేదా?. అప్పుడు ప్రజలందరూ తిట్టినా..సంతోషంగా వాటిని తీసుకున్నది చంద్రబాబే కదా?.

6జాతీయ ప్రాజెక్టు అయిన పోలవరం కాంట్రాక్టు పనులను రాష్ట్ర ప్రభుత్వం చేతికి తెచ్చుకోవటానికి చంద్రబాబు తన సీనియారిటీని ఉపయోగించుకున్నారా?

7.నాలుగేళ్లు ప్రభుత్వంలో భాగస్వామిగా ఉండి ఏమీ సాధించలేని చంద్రబాబు లాంటి సీనియర్ ఇప్పుడు పోరాడి సాధించగలరా?. పోరాడటానికి ఏపీలో బిజెపికి ఉన్న బలం ఎంత?. బలగం ఎంత?.

8.545 ఎంపీ సీట్లు ఉన్న దేశంలో ఇప్పుడు తనకు 25 ఎంపీ సీట్లు ఇస్తే చాలు…తానే ప్రధానిని డిసైడ్ చేస్తాడట. అంటే 80 సీట్లు ఉన్న ఉత్తరప్రదేశ్ వంటి రాష్ట్రాలు చంద్రబాబు నిర్ణయాన్ని ఆమోదిస్తాయా?. మిగిలిన పార్టీలకు సీట్లు రావా…వాళ్లకు చంద్రబాబులా ఏజెండాలు ఉండవా?.

9.ఎన్నికలకు ముందు తన అనుభవంతో రైతు రుణమాఫీతోపాటు..రాజధాని కూడా అద్భుతంగా కడతానని ప్రజలను నమ్మించి…రైతు రుణమాఫీలో అడ్డంగా కోతలు పెట్టడానికి ఉపయోగించుకున్నారా తన సీనియారిటీని?

10.చంద్రబాబు ప్రస్తుతం తన సీనియారిటీని కేబినెట్ లో అక్రమాలను సక్రమం ఎలా చేసుకోవాలా?. అధికారులు వద్దన్నా ఎలా ముందుకు వెళ్ళాలా అనే పనికే వాడుతున్నారు.

Source-Telugu Gateway

Advertisements

5 Comments

Filed under Uncategorized

హెరిటేజ్ భూకుంభకోణం

అమరావతి లో హెరిటేజ్ భూకుంభకోణం -సాక్షి పరిశోధన
బాబు CM అయిన నెల రోజులకు అమరావతి ప్రాంతం కంతేరు లో హెరిటేజ్‌ ఫుడ్స్‌ సంస్థ మొత్తం 14.22 ఎకరాలను ఒక కోటి 23 లక్షల 76 వేలకు కొన్నది అంటే సగటున ఎకరం 8 లక్షల 70 వేలకు కొన్నది, కంపెనీ కొనుగోలు చేయగానే ఆ భూమి ఎదుట రాజధాని ప్రకటన వచ్చింది.చుట్టు పక్కల గ్రామాల భూములు రాజధాని పూలింగ్‌లోకి వెళ్లినా… చెక్కు చెదరకుండా కంపెనీకే మిగిలింది.

(హెరిటేజ్ పేరు మీద 14 ఎకరాలు కొన్నవాళ్ళు బినామీల పేరుతొ ఎన్ని వేల ఎకరాలు కొని ఉంటారో?)

పూలింగ్‌ నుంచి మినహాయింపు
రాజధాని కోసం ప్రభుత్వం భూసమీకరణ (ల్యాండ్‌ పూలింగ్‌) ప్రక్రియ చేపడుతున్నట్లు 2015, జనవరి 1న నోటిఫికేషన్‌ జారీచేసింది. గుంటూరు జిల్లా తుళ్లూరు, మంగళగిరి మండలాల్లోని మొత్తం 29 గ్రామాలను ల్యాండ్‌ పూలింగ్‌ పరిధిలో చేర్చారు. కానీ, చంద్రబాబు కుటుంబ సంస్థ హెరిటేజ్‌ ఫుడ్స్, ఆయన సన్నిహితుడైన లింగమనేని సంస్థకు చెందిన భూములు ఉన్న తాడికొండ మండలం కంతేరు గ్రామాన్ని పూలింగ్‌ ప్రక్రియలో చేర్చనే లేదు.

మంగళగిరి మండలం నిడమర్రు గ్రామం వరకు ల్యాండ్‌ పూలింగ్‌ కింద భూములు తీసుకున్నారు. కానీ, నిడమర్రును ఆనుకునే ఉన్న కంతేరు ల్యాండ్‌ పూలింగ్‌లో లేకపోవడం గమనార్హం. చంద్రబాబు కుటుంబ సంస్థ అయిన హెరిటేజ్‌ పుడ్స్‌ కొనుగోలు చేసిన భూములతోపాటు, ఆయన సన్నిహిత సంస్థ లింగమనేని (చౌదరి)ఎస్టేట్స్‌కు చెందిన వందలాది ఎకరాలు కంతేరులోనే ఉన్నాయి. అమాంతం ధరలు పెరిగిన ఆ భూములన్నీ హెరిటేజ్, లింగమనేని ఎస్టేట్‌ గుప్పిట్లోనే ఉండేట్లుగా వ్యూహాత్మకంగా వ్యవహరించింది.తరువాత ఎకరం ధర 3 -5 కోట్లకు పెరిగింది.

హెరిటేజ్, లింగమనేని సంస్థలకు రూ.వేల కోట్ల లబ్ధి.

ఆ భూములన్నీ గుంటూరు జిల్లా తాడికొండ సబ్‌ రిజిస్ట్రార్‌ ఆఫీసు పరిధిలో ఉన్నాయి. కానీ, ఆ భూములను పెదకాకాని సబ్‌రిజిస్ట్రార్‌ కార్యాలయంలో రిజిస్ట్రేషన్‌ చేయించడం గమనార్హం.

[2014, జూలై 7న గుంటూరు జిల్లా తాడికొండ మండలం కంతేరు గ్రామంలో పలుచోట్ల హెరిటేజ్‌ ఫుడ్స్‌ సంస్థ భూములు కొనుగోలు చేసింది. సర్వే నంబర్లు 27/3బి, 22/2ఎ, 63/1, 62/2బి, 27/3ఎలలో 7.21 ఎకరాలు కొనుగోలు చేయడం గమనార్హం. ఆ 7.21 ఎకరాలను రూ.67.68లక్షలకు కొనుగోలు చేశారు. ఈ భూములన్నీ కూడా విజయవాడకు చెందిన మొవ్వా శ్రీలక్ష్మి అనే ఆమె నుంచి కొన్నారు. ఆ భూములను కూడా మొవ్వా శ్రీలక్ష్మీ గతంలో జీపీఏ ద్వారానే పొందడం గమనార్హం.

2014, సెప్టెంబరు 8న హెరిటేజ్‌ ఫుడ్స్‌ సంస్థ కంతేరు గ్రామంలోనే మరోసారి భూములు కొనుగోలు చేసింది. సర్వే నంబర్లు 56, 63/2బిలలో ఉన్న 2.46 ఎకరాలను రూ.19.68లక్షలకు కొనుగోలు చేశారు. ఆ భూములను విజయవాడకు చెందిన చిగురుపాటి వెంకటగిరిధర్‌ అనే వ్యక్తి అంతకుముందు కొంతకాలం క్రితమే జీపీఏ ద్వారా పొందారు. ఆయన ఆ భూములనే హెరిటేజ్‌ ఫుడ్స్‌ సంస్థకు విక్రయించారు.

2014, సెప్టెంబరు 8న హెరిటేజ్‌ ఫుడ్స్‌ సంస్థ కంతేరులోనే మరికొన్ని భూములను కొనుగోలు చేసింది. సర్వే నంబర్లు 56, 63/1, 63/2బి లలో ఉన్న 4.55 ఎకరాలను కొన్నారు. ఆ 4.55 ఎకరాలను రూ.36.40లక్షలకు లింగమనేని ప్రాజెక్ట్స్‌ ప్రైవేటు లిమిటెడ్, లింగమనేని ఇన్ఫోసిటీ ప్రైవేటు లిమిటెడ్‌ సంస్థల నుంచి కొనుగోలు చేయడం గమనార్హం.]

రాజధానిపై తప్పుదోవ పట్టించి మరీ..
చంద్రబాబు సీఎంగా ప్రమాణస్వీకారం చేసిన వెంటనే గుంటూరు జిల్లా తాడికొండ, మంగ ళగిరి నియోజకవర్గాల పరిధిలో రాజధానిని ఎంపిక చేయాలని నిర్ణయించి ఇన్‌సైడర్‌ ట్రేడింగ్‌కు తెరతీశారు. అందులో భాగంగా.. ఉద్దేశపూర్వకంగా రాజధాని ప్రాంతంపై ఇతర ప్రాంతాల పేర్లను ప్రచారంలోకి తెచ్చారు. కృష్ణా జిల్లా నూజివీడు, గుంటూరు జిల్లా నాగార్జున విశ్వవిద్యాలయం, పశ్చిమ గోదావరి జిల్లా ఏలూరు వంటి పలు ప్రాంతాలను రాజధానిగా ఎంపిక చేయనున్నారని ప్రచారంలోకి తెచ్చారు. దాంతో రాష్ట్రంలో ఎంతోమంది రియల్‌ ఎస్టేట్‌ వ్యాపారులు, ఇతరులు ఆ ప్రాంతాల్లో భారీగా భూములు కొనుగోలు చేశారు.

ఆ తర్వాత సీన్‌ పూర్తిగా మార్చేశారు. గుంటూరు జిల్లా తాడికొండ, మంగళగిరి ప్రాంతాల్లో భూములు కొనుగోలు వ్యవహారం పూర్తయిన తరువాత చంద్రబాబు అసలు కథకు తెరతీశారు. ఆ ప్రాంతాన్ని రాజధానిగా ఎంపిక చేసినట్లు 2014, డిసెంబర్‌ 28న ప్రభుత్వం ప్రకటించింది. దాంతో ఆ ప్రాంతంలో ఎకరా మార్కెట్‌ విలువ రూ.5లక్షలు ఉన్న భూముల ధరలు పెరిగిపోయాయి. ఎకరా మార్కెట్‌ ధర రూ.3 కోట్ల నుంచి రూ.5 కోట్లకు చేరుకుంది. తద్వారా చంద్రబాబు, ఆయన బినామీలు, సన్నిహితులు వేలకోట్లు కొల్లగొట్టారు.

-సాక్షి
===================================
Note: బాబు నివాసముంటున్న అక్రమ కట్టడం బాబు బినామీ లింగమనేని చౌదరి దే.

అమరావతి రాజధాని కుంభకోణం దేశం లోనే అతి పెద్ద భూ కుంభకోణము- రిటైర్డ్ IAS EAS శర్మ

ఆంధ్రప్రదేశ్‌లో అవినీతి విలయతాండవం
ప్రతిచోటా అవినీతి వేళ్లూనుకుపోయింది
రాజధాని ముసుగులో సర్కారు రియల్‌ ఎస్టేట్‌ వ్యాపారం
అధికారాన్ని ఒకేచోట కేంద్రీకరించడం తప్పుడు విధానం
సింగపూర్‌ కన్సార్టియం ప్రతిపాదనను సర్వీసులో ఉండగానే తప్పుపట్టాను
-ప్రభుత్వ మాజీ ప్రధాన కార్యదర్శి అజేయ కల్లం

అమరావతి ఎంపికలో ఒక జాతి ప్రయోజనాలు అవినీతి , రియల్ ఎస్టేట్ వ్యాపారం ఉన్నాయి,
-ప్రభుత్వ మాజీ ప్రధాన కార్యదర్శి IYR కృష్ణ రావు

కమ్మ కులస్థుల లబ్ది కోసమే అమరావతి ఎంపిక జరిగింది
శివరామకృష్ణన్ కమిటీ విజయవాడ గుంటూరు లో రాజధాని వద్దు అని చెప్పినా అక్కడ పెట్టడానికి కారణం అయన కులస్థులు అక్కడ ఎక్కువగా ఉండడమే-టైమ్స్ అఫ్ ఇండియా
[Vijayawada-Guntur may be Naidu’s choice for capital
-May 18,2014, Times Of India.
[It is a Kamma heartland and there is strong pressure from the community leaders to locate the capital in the region.

The financially strong Kamma community has been solidly backing the Telugu Desam Party since its inception and Naidu may not do anything that would go against them. By locating the capital in the Kamma heartland, he will keep the local landlords happy,” said sociologist V Satyanarayana of Vijayawada].

బాబు ఏది చేసిన అవినీతి, కుల ప్రయోజనాలు ఉంటాయి
-లండన్ రీసెర్చ్ స్కాలర్ Dalel Benbabaali

26 Comments

Filed under Uncategorized

చంద్రబాబు గ్రాఫ్ నేలచూపులు

చంద్రబాబు గ్రాఫ్ నేలచూపులు
గత ఎన్నికల నాటి ఓటు బ్యాంకులో భారీ కోత
ఆంధ్రప్రదేశ్ లో టీడీపీ అధినేత, ముఖ్యమంత్రి చంద్రబాబునాయుడి ‘గ్రాఫ్’ శరవేగంగా పడిపోతుందా?. అంటే అవుననే అంటున్నాయి టీడీపీ వర్గాలు సైతం.

గత నెల రోజుల వరకూ వచ్చే ఎన్నికల్లో ఎలాగైనా విజయం సాధిస్తామనే ధీమా టీడీపీ నేతలు..పార్టీ శ్రేణుల్లో ఉండేది. కానీ ఆకస్మాత్తుగా చోటుచేసుకున్న పరిణామాలు టీడీపీ శ్రేణులను విస్మయానికి గురిచేస్తున్నాయి.

‘ప్రత్యేక హోదా’ విషయంలో చంద్రబాబు నాలుగేళ్ల పాటు రకరకాల మాటలు మార్చి…చివరి నిమిషంలో మళ్లీ ‘ప్రత్యేక హోదా’ అందుకున్న తీరు చూసి ఏపీ ప్రజల్లో..ముఖ్యంగా తటస్థులను తీవ్ర అసంతృప్తిని గురిచేసింది. చాలా మంది ఈ విషయాన్ని బహిరంగంగానే వ్యక్తపరుస్తున్నారు కూడా.

దీని కంటే అత్యంత కీలకమైన అంశం జనసేన అధినేత పవన్ కళ్యాణ్ సరిగ్గా నెల రోజుల కిందట చేసిన వ్యాఖ్యలు. ముఖ్యంగా చంద్రబాబు, ఆయన తనయుడు నారా లోకేష్ పై చేసిన అవినీతి ఆరోపణలు ఏపీలో తీవ్ర చర్చనీయాంశం అయ్యాయి. అంతే కాదు..అప్పటివరకూ చంద్రబాబును సమర్థిస్తూ వచ్చిన పవన్ తీరును తప్పుపట్టిన వారిలో చాలా మంది ఆవిర్భావ సభలో పవన్ చేసిన వ్యాఖ్యలతో ఆయన వైపు మారిపోయారు.

గత ఎన్నికల్లో కేవలం చంద్రబాబు అనుభవం రాష్ట్రానికి ఉపయోగపడుతుందని మద్దతు ఇచ్చానని..కానీ ఆయన అనుభవం ఏ మాత్రం పనిచేయలేదని పవన్ కళ్యాణ్ కుండబద్దలు కొట్టేసి మరీ చెప్పారు. పవన్ కళ్యాణ్ తనకు కులాలు..మతాలు..ప్రాంతాల పట్ల పట్టింపులేదని..తాను అందరివాడినని చెబుతున్నారు. ఆయన ఏమి అనుకుంటున్నా ఏపీలో ముఖ్యంగా కాపు సామాజిక వర్గం అంతా ప్రస్తుతం పవన్ వైపునకు పూర్తిగా మారిందని టీడీపీ నేతలు సైతం అంతర్గత సంభాషణల్లో అంగీకరిస్తున్నారు. గత ఎన్నికల్లో వీరంతా చంద్రబాబుకే మద్దతు ప్రకటించారు. అందుకు పవన్ కళ్యాణ్ కూడా ఓ కారణం. ఈ లెక్కన చూస్తే చంద్రబాబుకు గత ఎన్నికల్లో ఉపయోగపడిన 10 శాతం ఓటు బ్యాంకు నికరంగా దూరం అయినట్లే.

ఏపీ మొత్తంలో కాపు సామాజిక వర్గం జనాభా 12 నుంచి 14 శాతం వరకూ ఉంటుందని అంచనా. దీనికితోడు గత ఎన్నికల్లో చంద్రబాబుకు అప్పట్లో మోడీపై ఉన్న ఇమేజ్ చాలా ఉపయోగపడింది. అయితే ఇప్పుడు ఏపీలో ప్రధాని మోడీ ఇమేజ్ ఏమీలేకపోయినా గత ఎన్నికల్లో కలిసొచ్చిన ఈ ఓటు బ్యాంకు చంద్రబాబుకు దూరమైనట్లే.

అయితే గత ఎన్నికల్లో తాము సొంతంగానే గెలిచామని చంద్రబాబు..టీడీపీ నేతలు ఇప్పుడు చెప్పుకుంటున్నా అసలు విషయం ఏమిటో అందరికీ తెలిసిందే. అంటే ఈ లెక్కన చంద్రబాబుకు గత ఎన్నికల్లో సహకరించిన సామాజిక వర్గాలపరంగా ఉన్న 10 శాతం పైగా ఓటు బ్యాంకు దూరమైనట్లే.

గత ఎన్నికల్లో చంద్రబాబు అత్తెసరు ఓట్ల తేడాతోనే అధికారం దక్కించుకున్నారు. దీనికి తోడు రాజధాని అమరావతిలో కాంట్రాక్ట్ ల దోపిడీ తప్ప..రాజధాని నిర్మాణం అడుగు ముందుకు పడకపోవటం…ఏపీలో పెచ్చరిల్లిన ప్రభుత్వ అవినీతి మరికొంత నష్టం చేయటం ఖాయం.

ఈ లెక్కన చూస్తే చంద్రబాబుకు రాబోయేది అత్యంత గడ్డుకాలమే అని టీడీపీ నేతలు అభిప్రాయపడుతున్నారు. తాజా పరిణామాలు చంద్రబాబుకు కంటిమీద కునుకులేకుండా చేస్తున్నాయి.

http://telugugateway.com/2018/04/chandrababu-graph-down-fastly-in-andhra-pradesh/

Leave a comment

Filed under Uncategorized

అవకాశవాదానికి పోతే ఇంతే బాబూ!

రాష్ట్రంలో వేగంగా జరుగుతున్న రాజకీయ పరిణామాలు చంద్రబాబును ఒంటరిపాటు చేస్తున్నాయి. అపర చాణక్యుడిగా నాలుగేళ్లపాటు కీర్తింపబడిన చంద్రబాబు ప్రస్తుతం తత్తరపడి పోతున్నారని సొంత పార్టీ వారే అంటున్నారు. చంద్రబాబు బిత్తర చూపులు అర్థమయి తెలుగు తమ్ముళ్లు పక్క చూపులు చూస్తున్నారని, రాజకీయ వలసలు తెలుగు దేశంలో జోరందుకోబోతున్నాయని అంటున్నారు. ఎన్నికలకు ఏడాది ముందుగానే భవిష్యత్‌ రాజకీయ చిత్రపటం చంద్రబాబుకు అనుకూలంగా లేదన్న వాదనలకు బలం చేకూరుతున్నది.

ఈ పరిస్థితికి చంద్రబాబు అనుసరించిన అవకాశవాద వైఖరే ప్రధాన కారణం. మూడేళ్ళ కిందటే ప్రత్యేక హోదా రాదని తేలిపోయినా, ఈ నాలుగేళ్ళు బిజెపితో అంట కాగడం ఆయన చేసిన పెద్ద తప్పు. విభజిత ఆంధ్రప్రదేశ్‌కి ప్రత్యేక హోదా ద్వారా మాత్రమే న్యాయం జరుగుతుందని ప్రజలు భావిస్తుంటే … హోదా సంజీవని కాదు, హోదా కంటే మెరుగైన నిధులు, ఫలితాలు సాధిస్తానని చంద్రబాబు ప్రగల్భాలు పలికారు.

హోదా ఇవ్వలేమని కేంద్ర పెద్దలు అధికారంలోకి వచ్చిన కొద్ది కాలానికే పలుమార్లు ప్రకటనలు చేసినా బాబుగారు అస్త్ర సన్యాసం చేసి జీహుజూర్‌ అంటూ కేంద్రానికి వంత పాడటం మరో తప్పు. ప్రత్యేక హోదాను అడిగిన వామపక్షాలపై, ప్రధాన ప్రతిపక్షంపై నిర్భంద కాండను యథేచ్ఛగా చంద్రబాబు సాగించడం మరో తీవ్ర తప్పిదం.

రాష్ట్రంలో ప్రతిపక్షాలనేవే లేవని తానే సర్వాంతర్యామి అన్నట్టుగా, తనను ప్రశ్నించే వారి పట్ల అమానుషంగా వ్యవహరించారు.

తెలుగుదేశం లోని ఇతర నేతలను సైతం అధికారులు లెక్క చేయటం లేదు. చంద్రబాబు, చినబాబుల ‘హవా’ తప్ప మరొకరి మాట చెల్లుబాటు కాలేదు. జిల్లాలలో మంత్రులు, ఎంఎల్‌ఏల మాటకు అధికారుల వద్ద విలువ లేదన్న విమర్శ పెద్ద ఎత్తున వచ్చింది.
తాను మారిన మనిషినని పదే పదే చెప్పుకునే చంద్రబాబు అధికారంలోకి వచ్చాక మారకపోగా మరింత చాదస్తంగా తయారయ్యారని పలువురు సీనియర్‌ ఐఏఎస్‌లు అనేకసార్లు వ్యాఖ్యానించారు. చెప్పిందే చెప్పుకోవటం, గంటల తరబడి మాట్లాడటం, టెలికాన్ఫరెన్సులు, వీడియో కాన్ఫరెన్సులు అంటూ ముఖ్యమంత్రి నుంచి కలెక్టర్‌ దాకా పనులు విడిచి కాలయాపనలు చేయటం ఈ కాలంలో పరిపాటి అయింది.

అభివృద్ధి పేర రాష్ట్రంలో మాయా ప్రపంచాన్ని సృష్టించాలను కున్నారు చంద్రబాబు. అందుకోసం మీడియా, సోషల్‌ మీడియాను వేదిక చేసుకొని ప్రతి కార్యక్రమాన్ని ఈవెంట్లుగా మార్చేశారు. ప్రభుత్వ, ప్రయివేటు, రాజకీయ వేదికలు ఏవైనా చంద్రబాబు భజన పరిపాటి అయిపోయింది.

రాష్ట్రంలో 1000కి పైగా పరిశ్రమలు, 10 లక్షల మందికి ఉపాధి, నాలుగు లక్షల కోట్లు పెట్టుబడులుగా వచ్చాయని బాబుగారు పదే, పదే చెప్పేవారు. ప్రపంచ రాజధానులను తలపించే రాజధాని నిర్మాణం చేస్తున్నానని నిత్యం హంగామా చేసేవారు! రైతాంగం గురించి కానీ, వ్యవసాయ కూలీలు, భూములు కోల్పోతున్న ప్రజలు, కనీస వేతనం పెరుగుదలకై వేచి ఉన్న కార్మికులు, దళితులు, గిరిజనులు, మైనారిటీలు, మహిళలు ఎదుర్కొంటున్న సమస్యలు పట్టించుకున్న పాపానపోలేదు.

-ప్రజాశక్తి , Apr 10, 2018

2 Comments

Filed under Uncategorized

జగన్ మీద పెట్టిన 11 చార్జీషీట్ల మొత్తం విలువ 1300 కోట్లు–ఉండవల్లి

జగన్ మీద పెట్టిన 11 చార్జీషీట్ల మొత్తం విలువ 1300 కోట్లు–ఉండవల్లి
కానీ జగన్ లక్ష కోట్లు తిన్నాడని టిడిపి సభ్యులు నానాయాగీ చేసారు.ఈ మధ్య జగన్‍‌ విమానాశ్రయంలో కలిసి అన్నా 1300 కోట్లు అంటున్నావు ,500 కోట్లు క్లియర్ అయిపోయాయని, ఇంకా ఉంది 800 కోట్లేనని నాతొ చెప్పాడు

800 కోట్లు ఎక్కడ లక్ష కోట్లు ఎక్కడ ?

రసీదు ఇచ్చాడుగా, క్విడ్ ప్రోకో ఎలా అవుతుంది?

కరప్షన్ అంటే ఎవరికైనా ఉపకారం చేసి కొంత డబ్బు తీసుకోవడమని, తండ్రి సీఎం అయినంత మాత్రాన బిజినెస్ చేయవద్దని లేదని, జగన్ రూ.1300 కోట్లు పెట్టుబడి పెట్టారని, లంచం తీసుకున్నవాడు ఎవరైనా ఆ లంచానికి రసీదు ఇస్తాడా అని, జనగ్ వాళ్ళకు షేర్లు ఇచ్చి, రసీదు ఇచ్చాడని, ఇది క్విడ్ ప్రోకో ఎలా అవుతుందని ఉండవల్లి అన్నారు.

జగన్ వద్ద ఉన్న డబ్బు రిజిస్టర్ ఆఫ్ కంపెనీస్‌లో రిజిస్టర్ అయి ఉన్నవే తప్ప ఒక్క రూపాయి ఎక్కువ లేదు

8 Comments

Filed under Uncategorized

పోలవరం అవినీతి పై బాబు కు 8 ప్రశ్నలు వేసిన KVP

1.2015 మార్చిలో పిపిఎ అధికారులు పోలవరం అంచనాలను ప్రస్తుత ధరలకు సవరించి ఇవ్వాలని కోరగా, ఒక నెలలో ఇస్తామని చెప్పిన మీరు 2016 సెప్టెంబర్‌లో కేంద్రం ప్యాకేజి ప్రకటించే నాటికి కూడా ఇవ్వకుండా ఎందుకు నాటకాలు ఆడారు?

2.పిపిఎ అధికారులు 2014 మార్చి 31కి ముందు ప్రాజెక్ట్‌పై చేసిన ఖర్చును రాష్ట్ర వాటాగా భావిస్తామని, అదేవిధంగా.2014 ఏప్రిల్‌ 1 తరువాత ప్రాజెక్ట్‌పై అయ్యే ఖర్చులో ప్రతి పైసా కేంద్రమే భరిస్తుందని పదేపదే స్పష్టం చేసింది. అయినా ఎందుకు ప్రతి సమావేశంలో పాత ఖర్చులు, ఇతర జాతీయ ప్రాజెక్ట్‌లకు వలే 90శాతం నిధులివ్వాలని డిమాండ్‌ చేశారు?

3.జీవో నెంబర్‌ 22 జారీ చేసిన తరువాత, అదనంగా లేబర్‌, యంత్రాలు, ఇతర మెటీరియల్‌ ధరల తేడాలు ప్రభుత్వమే భరిస్తే..కాంట్రాక్టర్లకు నష్టం వచ్చే అవకాశం ఎక్కడున్నది?

4.కేంద్రమిచ్చిన ప్యాకేజీలో.2014 ఏప్రిల్‌ 1 నాటి ధరల ప్రకారమే నిధులు ఇస్తామనే షరతుకు మీరేందుకు అంగీకరించారు?

5.2018 జనవరి 11న జరిగిన పిపిఎ ఏడో సమావేశంలో అధికారులు పునరావాస కార్యక్రమాలకు పెద్ద మొత్తంలో కావలసిన నిధులు ఎలా సమకూర్చుకొంటారని అడిగినప్పుడు, కేంద్రమే ఇవ్వాలని తేల్చి చెప్పకుండా, పునరావాసం ఫేజ్‌ల వారీగా చేస్తామని ఎందుకు చెప్పారు?

6.ఏప్రిల్‌లో నిపుణుల కమిటీకి ప్రాజెక్ట్‌ అంచనాలు రూ.46,926 కోట్లుగా చెప్పిన మీరు, ఆగష్టు నాటికి అంచనాలను రూ.58,319 కోట్లకు ఎలా పెంచారు?

7.పోలవరం హెడ్‌వర్క్స్‌లో మిగిలిన పనికి 2015-16 అంచనాల ప్రకారం రూ.5,535 కోట్లు ఖర్చుగా పేర్కొంటూ 2016 సెప్టెంబర్‌ 8న జీవో 96 జారీ చేసిన మీరు, అదే హెడ్‌వర్క్స్‌ మిగిలిన పనికి 2013-14 అంచనాల ప్రకారం రూ.11,638 కోట్లు ఖర్చుగా పేర్కొంటూ కేంద్రానికి ఎలా పంపారు?

8.పోలవరం పూర్తి ఖర్చును విభజన చట్టం ప్రకారం కేంద్రమే భరించాలని మీరు ఇప్పటికీ అనుకొన్నట్లైతే..అదే విషయాన్ని హైకోర్లులో తాను వేసిన ప్రజా ప్రయోజన వ్యాజ్యంలో కౌంటర్‌ ద్వారా తెలియపరిచేందుకు ఎందుకు భయపడుతున్నారు?

18 Comments

Filed under Uncategorized

భాగస్వామ్య ప్రహసనం-ప్రజాశక్తి

విశాఖలో భారీ హంగులు, ఆర్భాటాల మధ్య మూడు రోజుల పాటు సాగిన భాగస్వామ్య సదస్సు పిసి సర్కార్‌ మ్యాజిక్‌ షోను తలపించింది. వందల్లో అవగాహనా ఒప్పందాలు, లక్షల కోట్లలో పెట్టుబడులు, ఇబ్బడి ముబ్బడిగా ఉద్యోగాలంటూ ప్రభుత్వం చేసిన ప్రకటనల హోరు, వాటినే పరమ సత్యాలుగా ప్రచార బాకాలు మోత మోగించిన తీరు చూస్తే పెట్టుబడులు సునామీలా వచ్చి పడబోతున్నాయని, ఇక నిరుద్యోగ సమస్య అనేదే వుండదనేంతగా ప్రచారం సాగింది.

ఆంధ్ర ప్రదేశ్‌ పారిశ్రామికంగా శరవేగంగా అభివృద్ధి చెందితే సంతోషించనివారెవరుంటారు. విభజన తరువాత రాష్ట్రం వ్యవసాయ, పారిశ్రామిక, సేవలు తదితర రంగాల్లో ఇతర రాష్ట్రాలతో పోటీపడి అభివృద్ధి చెందాలని, అందరికీ ఉపాధి దొరకాలనేదే అయిదు కోట్ల మంది ఆంధ్ర పజల ప్రగాఢ ఆకాంక్ష. ఆ దిశగా ప్రభుత్వం కృషి చేస్తే ఎవరూ ఆక్షేపించాల్సిన పని లేదు.

కానీ విశాఖ భాగస్వామ్య సదస్సులో గతంలో మాదిరిగానే పాత ప్రతిపాదనలకే కొత్త ఎంఒయు ముసుగులేయడం, రాని పెట్టుబడులను వచ్చినట్లు, లేని ఉద్యోగాలు కల్పించేసినట్లు భ్రమలు కల్పించడమే అభ్యంతరకరం.

స్విట్జర్లాండ్‌లోని దావోస్‌లో ఏటా జరిగే ప్రపంచ ఆర్థిక వేదిక (డబ్ల్యు ఇఎఫ్‌) తరహాలో సిఐఐతో కలిసి మన రాష్ట్రంలో ప్రతి ఏటా ఇటువంటి సదస్సులు నిర్వహించి పెట్టుబడులను పెద్దయెత్తున ఆకర్షిస్తామని ముఖ్యమంత్రి ప్రకటించారు.

ఇందుకోసం విశాఖలో ఓ బ్రహ్మాండమైన అంతర్జాతీయ సమావేశ కేంద్రం, అయిదు నక్షత్రాల హోటల్‌, షాపింగ్‌ మాల్‌ ఏర్పాటుకు దుబాయికి చెందిన లూలూ గ్రూపు సంస్థతో ఒక అవగాహనా ఒప్పందం కూడా కుదుర్చుకున్నారు. విలాసవంతమైన సమావేశ మందిరాలు, ఖరీదైన హోటళ్లు, భారీ షాపింగ్‌ మాల్స్‌ కడితే పెట్టుబడిదారులు ఆంధ్ర ప్రదేశ్‌కు క్యూ కడతారనేది భ్రమ.

విశాఖలో గత మూడేళ్లలో ఈ భాగస్వామ్య సదస్సుల కోసం ప్రభుత్వం కొన్ని వందల కోట్లు వెచ్చించి అనేక హంగులు, ఆర్బాటాలు చేసినా, ముఖ్యమంత్రి ఆధ్వర్యంలో మంత్రులు, ఉన్నతాధికారుల బృందం విదేశీ యాత్రలు, రోడ్‌ షోలు ఎన్ని నిర్వహించినా పెట్టుబడులు వచ్చింది చాలా తక్కువ.

పెట్టుబడికి కావాల్సింది లాభం. ఎక్కడ ఎక్కువ లాభం వస్తుందనుకుంటే అక్కడికి అది పరుగులు తీస్తుంది. పెట్టుబడి స్వభావమే అంత. అంతేకాదు పెట్టుబడులు రావడంతోనే ఉపాధి దానంతటది పెరుగుతుందనుకోవడం కూడా పొరపాటు. ఆ పెట్టుబడులు ఏ రంగంలో వస్తున్నాయన్నది కూడా ముఖ్యం. నయా ఉదారవాద ఆర్థిక విధానాలు అమల్లోకి వచ్చాక ఉపాధి రహిత అభివృద్ధి అనేది ఒక పెద్ద సమస్యగా ముందుకొస్తున్నది. ఆధునిక టెక్నాటజీతో వస్తున్న పెట్టుబడులు కొత్త ఉద్యాగాలిస్తున్నది చాలా తక్కువ కానీ స్థానిక ప్రజల జీవనోపాధిని పెద్ద ఎత్తున దెబ్బ తీస్తున్నాయి. దాంతో మొత్తంగా ఈ పెట్టుబడుల వల్ల నిరుద్యోగం పెరుగుతున్నదే గానీ తగ్గం లేదు.

మరో ఏడాదిలో రానున్న ఎన్నికల్లో రాజకీయ లబ్ధి కోసం రాష్ట్ర ప్రజలకు మరోసారి అరచేతిలో వైకుంఠం చూపిస్తున్నారు. తాజా భాగస్వామ్య సదస్సు వల్ల 4లక్షల కోట్ల పెట్టుబడులు తరలివస్తున్నట్లు, దీనివల్ల పదకొండు లక్షల మందికి కొత్తగా ఉద్యోగాలు రాబోతున్నట్లు త్రీడీ చిత్రం చూపిస్తున్నారు.

ప్రజల వద్ద కొనుగోలు శక్తి పెంచేందుకు కృషి చేయకుండా, కొత్తగా పరిశ్రమలు పెట్టేవారికి పూర్తి పన్ను రాయితీ కల్పించే ప్రత్యేక హోదా గురించి పట్టించుకోకుండా భాగస్వామ్య సదస్సుల పేరుతో 2016లో 4.76 లక్షల కోట్లు, 2017లో 10.54 లక్షల కోట్ల పెట్టుబడులు ఆకర్షించామని ప్రభుత్వం చూపే లెక్కలన్నీ కాగితాలపై బాగానే కనిపిస్తున్నా, వాటిలో కార్య రూపం దాల్చినవి చాలా తక్కువ.

1991-2014 మధ్య రాష్ట్ర ప్రభుత్వానికి, వివిధ సంస్థలతో 8,96,000 కోట్ల పెట్టుబడులకు సంబంధించిన అవగాహనా ఒప్పందాలు కుదుర్చుకుంటే వాటిలో 4.67 శాతం మాత్రమే ఆచరణ రూపం దాల్చాయి.

సిఐఐ భాగస్వామ్య సదస్సులు ఒక్క మన రాష్ట్రంలోనే కాదు, చాలా రాష్ట్రాల్లోనూ జరుగుతున్నాయి. అక్కడ పాల్గొన్న పెట్టుబడిదారులే ఇక్కడా పాల్గొంటారు. ఒకే విధమైన వ్యాపార అంశంపై విభిన్న ఎంఓయులను కుదుర్చుకుంటారు. ఇది నిత్యం జరుగుతున్న తంతు. విశాఖలోనూ అదే పునరావృతం అయింది.

మరోవైపు రాని పరిశ్రమలను సాకుగా చూపి ప్రభుత్వం రైతుల నుంచి భూములను బలవంతంగా లాక్కొని కార్పొరేట్‌ సంస్థలకు కట్టబెడుతోంది. ఏళ్లు గడిచినా పరిశ్రమ రాదు. భూములు, రాయితీలు, బ్యాంకు రుణాలు మాత్రం కార్పొరేట్‌ సంస్థలకు దక్కుతున్నాయి.

ఆంధ్ర ప్రదేశ్‌ అభివృద్ధి చెందాలంటే కేవలం పెట్టుబడులపై ఆధారపడితే చాలదు. ప్రజల వద్ద కొనుగోలు శక్తిని పెంచే చర్యలు చేపట్టాలి.

మరోవైపు రాష్ట్ర విభజన సందర్భంగా కేంద్ర ప్రభుత్వం హామీ ఇచ్చిన ప్రత్యేక హోదా అభిస్తే కొంతమేరకైనా పరిశ్రమలు మన రాష్ట్రంలోకి వస్తాయి. ఈ దిశగా కృషి చేయకుండా ప్రచారార్భాటంతో ప్రజలను వంచించబూనుకోవడం క్షంతవ్యం కాదు.

http://www.prajasakti.com/Article/Sampaadkeyam/2014248

12 Comments

Filed under Uncategorized